الكبة انا عملتها وعملتها صغييرة كتيير بحجم حبة العوامة (معدلة الله يرضى عليي) وطبعا احنا بنعمل الكبة وبنخزنها بالفريزر ووقت الحاجة بنطلعها وبنستخدمها
عشان هيك الكبة بلبن اكلة سريعة وسهلة وطيبة بالنسبة الي
اللبن بعمله كالآتي :
بسن اللبن ع النار وبس يغلى مع الاستمر بالتحريك (عشان ما يفرط اللبن ) بكون عاملة ماجي مدوبته بمي وبديره ع اللبن ، بس ما بحط كتييير مي ع اللبن لأني بدي يكون كثيف شوي
واذا طلع اللبن معي رخو بحط شويه نشا بحلها بمي باردة وبديرها ع اللبن وبحركه منيح واذا كان في حاجة لشوية ملح كمان بنضيف ملح حسب الرغبة
بعدين بقلي الكبة وبحطها في طبق التقديب وبسكب اللبن فوقها وزينتها باللوز المحمص ورشة نعنع ورسة سماق
وممكن تتقدم مع رز (أنا بعمل رز بسمتي وبضيفله شويه هال ) وبقدمه مع الكبة بلبن
وصحتين والف هنا :))
ما شاء الله عليكي فنانه انا بعشق الكبه اللبنيه كتيييير وهلأ انا حامل جبتيها على بالي نفسي فيها ان شاء الله هاليومين بعملها
ردحذفبس ممكن تعطيني طريقه الكبه ؟؟
مشكوووووووووررررره حبيبتي يسلمو ايديكي
طريقة الكبة سهلة
ردحذفوهو لكل كيلو برغل بتنقعيه منيح ليصير طري اله نص كيلو لحمة مفرومة ناعمة
وعند تبع اللحمة أو ع الفود بروسيسور بتفرمي اللحمة مع البرغل منيح ليصيروا عجينة ناعمة
و بتعجينيهم بايدك ليتجانسوا مع بعض و يصيروا عجينة متماسكة و طرية و طبعا بتحطيلها ملح و بهارات مشكلة لما تعجنيها منيح
وهي بتكون الكبة جاهزة لتستعمليها
بتكوني طابخة لحمة مفرومة مع بصل و بتضيفيلها الملح و البهار و بس تستوي و تتنشف ميتها للحمة بتكون جاهزة لتستعمليها
ممكن تضيفيلها مكسرات اللي بدك اياها لوز أو صنوبر وفي ناس بتحط جوز
و بتبلشي تاخدي بالعجينة وتحشيها باللحمة و تسكريها منيح و بتستخدمي لتسهيل عملية التكبيب مي و نشا مخلوطين ببعض و بتحطيها على ايدك لحتى ما تلزق الكبة في ايدك
و بالنشا والمي بتخلي سطح الكبة مستوي منيح وما في فراغات لحتى بس تقليها تضل محافظة على شكلها وما تفتح :)
yeslem edeki ya rab shahetni walla; ana bheb ektiir el2akl esoori
ردحذف